مەرسومی ئەنجامدانی ھەڵبژاردنی پێشوەخت ئیمزاکرا
سەرۆک کۆماری عێراق، مەرسومی کۆماری بۆ ئەنجامدانی ھەڵبژاردنی پێشوەخت ئیمزا دەکات و رایدەگەیەنێت، ھەڵبژاردنی داھاتوو گرنگ و بنیادنەر دەبێت.
دکتۆر بەرھەم ساڵح سەرۆک کۆماری عێراق، مەرسومی کۆماری تایبەت بە ئەنجامدانی ھەڵبژاردنی پێشوەختی ئیمزا کرد، لە وتەیەکیشدا رایگەیاند، ھەڵبژاردنی داھاتوو وێستەگەیەکی گرنگ و جیاکەرەوە و کۆڵەکەی قۆناغی داھاتووی عێراقە.
راشیگەیاند، لایەنە پەیوەندیدارەکان پابەندن بە رێگەخۆشکردن بۆ ھەڵبژاردنێکی پاک و بێگەرد و دوور لە ھەر گومان و نیگەرانییەک، کە لە رابردوودا ھۆکار بووە بۆ ناڕەزایەتی بەشێکی زۆری خەڵک، لە ئەنجامی ھەڵبژاردنەکان، بۆیە پێویستە ھەڵبژاردنەکە رەنگدانەوەی خواستی گەل بێت، بۆ چاکسازی و راستکردنەوەی رێڕەوی حوکمڕانی.
سەرۆک کۆماری عێراق جەختی لە پێوێستی ھەماھەنگی نێوان نەتەوەیەگرتووەکان و کۆمسیۆنی باڵای ھەڵبژاردنەکان کردەوە، لە پێناو چاودێری و پاک و بێگەردی ھەڵبژاردنەکە.
دەرکردنی مەرسومی کۆماری بۆ ئەنجامدانی ھەڵًبژاردن لە کاتێکدایە، بڕیارە ١٠ی ١٠ی ئەمساڵ پرۆسەی ھەڵبژاردنی پێشوەخت لە عێراق بەرێوەبچێت.
