هێنانەوەی رووفاتی 171 ئەنفالکراوی گەرمیان راگیراوە

قایمقامی چەمچەماڵ دەڵێ، هەموو ئامادەکارییەک بۆ هێنانەوەی رووفاتی 171 ئەنفالکراوی دەڤەری گەرمیان کراوە بەڵام حکومەتی عێراق و هەرێمی کوردستان بەهۆی بڵاوبوونەوەی ڤایرۆسی کۆرۆناوە هێنانەوەی ئەو رووفاتانەیان راگرتووە .

رەمک رەمەزان قایمقامی چەمچەماڵ راگەیاند، ئەمساڵ یادی 33 ساڵەی ئەنفال وەکو ساڵان ناکەنەوە ئەوەش بەهۆی هاتنی رەمەزان و بڵاوبوونەوەی ڤایرۆسی کۆرۆنا، یاداشتێکیان داوەتە پەرلەمانی کوردستان تێیدا داواکارییەکانی سنووری چەمچەماڵیان گەیاندووە بە پەرلەمان .

 رەمک رەمەزان دەڵێ، یەک خاڵی داواکارییەکانمان ناساندنی چەمچەماڵ وەکو پایتەختی شەهیدان و ئەنفالکراوان لەلایەن پەرلەمانی کوردستانەوە، لە 14/14/2015 ئەنجوومەنی پارێزگای سلێمانی چەمچەماڵی وەکو پایتەختی شەهیدان و ئەنفالکراوان ناساندووە بەڵام تاوەکو ئیستا لە پەرلەمان دەنگی لەسەر نەدراوە .

قایمقامی چەمچەماڵ دەشڵێ، داوامان کردووە بە زووترین کات پرۆژەی ئاوی گۆپتەپە بچێتە بواری جێبەجێکردنەوە کە بەهۆیەوە قەزای چەمچەماڵ، ناحیەکانی شۆڕش و تەکیە و ١٧ گوندی ناحیەی ئاخجەلە لە گرفتی کەمئاویی رزگار دەکات،

دەشڵێ، پرۆژەی ئاوی گۆپتەپە یەکەم پرۆژەی ستراتیژی لە وەزارەتی پلاندانان، واتا یەکەم پرۆژەیە کە جێبەجێبکرێت لە دوای پەسەندکردنی پرۆژەیاسای بودجەی هەرێمی کوردستان .

سەبارەت بە هێنانەوە روفاتی ئەنفالکراوان لە باشووری عێراق، قایمقامی چەمچەماڵ دەڵێ، هەموو ئامادەکارییەک کراوە بۆ هێنانەوەی رووفاتی 171 ئەنفالکراو بەڵام هەولێر و بەغدا لەبەر کۆرۆنا رایانگرتووە .

وەڵامێک بنووسە

پۆستی ئەلیکترۆنییەکەت بڵاوناکرێتەوە. خانە پێویستەکان دەستنیشانکراون بە *